#إلي_قلبو_ضعيف_ميقراش
النادي الافريقي في ازمة كبيرة عندها 20 سنة . ماهيش مشكلة هزيمة او انتدابات فقط. فما ازمة في العمق .
المشكلة شكون الي واعي بالازمة و عندو الحلول . تنجم تلقا عباد عندها حلول و افكار . اما ماتلقاش شكون واعي ب عمق الازمة . مشكلتنا " عقلية" و "ثقافة" . الي صاير نتيجة لها الثقافة . بصراحة ولينا جمعية متوسطة . حتى عقليتنا انديراكتمون ستانسنا . كي نشوف عمناول جمعية خسارة 3 دربيات . كي نشوف جمعية 5 سنين 10 هزايم متتالية ضد نفس المنافس موش لازم نحكيو على تيتروات . هذا لكل و مافما حتى ردة فعل . بل اغلب الجمهور يقلك ناقصين تروشيك و ناقصين مدافع و وسط و يتصور انو الحل في 3 و 3 انتدابات فقط . فما مدونين معروفين قاعدين يغطيو و يكذبو على العباد و برشا من جمهور يتبع . قطيع . بصراحة مانحبش نكد عليكم انا للاسف موش بش تتصلح النادي الافريقي علقل 10 سنين اخرين . قبل سليم كانت بعيدة مع سليم رياحي حطمها بعد سليم شوف كيفاش بش تصلح الي صار مع سليم و مع الي قبلو . ازمة كبيرة و عميقة . اكثر من هكا جمهور يبرر في الفشل جمهور يقدس للملاعبية جمهور موش حاسس جملة . جمهور يخسر و في نفس نهار الهزيمة ينبر و يضحك . يعني كي تخزر من بعيد تلقا جمعية و جماهير و مسؤولين فما قبول غير معلن الي نحنا جمعية عادية . شويا تنرفيز على هزيمة و ترجع النفوس هادية .
انا كي قلت ثورة مانيش نحكي في كلام فارغ. 20 سنة غياب تام على كل حاجة تخص كرة قدم موش تيتروات برك . انتدابات. استشهار . استثمار . تكوين لاعبين. ماتشوات كبار . كورة . لعب . وصلنا حتى المواجهات المباشرة قبلنا الهزايم و اكثر من هكا فما شكون يقلك استمرارية و يزي من تهديم و عاود ابني .
حاولو تقبلو انو موش بش تتصلح الافريقي. لا عندنا الامكانيات و لا عندنا الأفكار و لا عندنا الرجال الي تفعل و لا عندنا جمهور واعي . فقدنا كل مقومات الجمعية الكبيرة و يلزم رجال بش ترجعها . و هذا موش بش يصير خاتر مافما حد واعي ب عمق الازمة . المشكلة فكرية و مبعد مشكلة هوية . فكرية ب معنى يلزم شكون فاهم المشاكل الحقيقية و هذا موش موجود . و مشكلة هوية ب معنى حد ماهو واعي الي نحنا جمعية كبيرة .
عام جاي ترجي و نجم حاضرين علينا احنا هاك تشوف خارجين من موسم فاشل و قبلو كيفو و قاعدين ب نفس الطريق و الامكانيات يعني مستحيل نكونو ب نفس ريتم متاعهم عام جاي و الي بعدو . و شوف بعد ما يخرجو هاذوما شوف شكون يجي يبدل حاجة . منتصر الوحيشي تحط منو 5 اخرين ماهيش بش تتصلح الافريقي علقل 10 سنين .
فما حل وحيد : يجي راجل واعي ب عمق الازمة يعمل ثورة كبيرة و يعرف يعملها و يكون دقيق جدا . بخلاف هذا حكاية فارغة . نتبعو في شعار لا اكثر لا اقل .
منقول و انا نساند